पवनानगर : मावळ तालुक्यातील पवना धरणालगतच्या ठाकूरसाई भागात एका व्हिला बंगल्यातील माळीच्या खोलीत दारूच्या नशेत झालेल्या वादातून मित्रानेच मित्राचा जीव घेतल्याची गंभीर घटना घडली आहे.
या प्रकरणी लोणावळा ग्रामीण पोलीस ठाण्यात खुनाचा गुन्हा दाखल करण्यात आला आहे. मृत व्यक्तीचे नाव दिनेश लक्ष्मण गरवड (वय ३६, रा. भाजे, ता. मावळ) असे आहे. त्याच्या भावाच्या तक्रारीवरून प्रणव विश्वजित डेका (वय १८, रा. चव्हाण नगर, वडगाव मावळ) याच्याविरोधात गुन्हा दाखल करण्यात आला आहे.
ही घटना ३ जुलैच्या मध्यरात्री सुमारे १२.३० वाजता घडली. आरोपी व मयत हे दोघेही त्या बंगल्यात माळीकाम करत होते. ते दारूच्या नशेत असताना मयत दिनेश गरवड याने आरोपीच्या आईबाबत आक्षेपार्ह वक्तव्य केले. त्यामुळे संतप्त झालेल्या प्रणवने लोखंडी कुदळीने दिनेशच्या डोक्यावर जोरदार वार केला, ज्यामध्ये त्याचा मृत्यू झाला.
घटनेची माहिती मिळताच पोलीस घटनास्थळी दाखल झाले व मृतदेह उत्तरीय तपासणीसाठी पाठवण्यात आला. आरोपीस ताब्यात घेण्यात आले असून या घटनेचा तपास पोलीस निरीक्षक दिनेश तायडे यांच्या मार्गदर्शनाखाली सहायक पोलीस निरीक्षक प्रशांत आवारे करत आहेत.
