लोणावळा : माजी नगरसेवक आणि लोणावळा शहर पत्रकार संघाचे अध्यक्ष विशाल पाडाळे यांची लोणावळा एज्युकेशन ट्रस्टच्या विश्वस्तपदी नियुक्ती करण्यात आली आहे. वलवण येथे असलेल्या नामांकित लोणावळा महाविद्यालयाचे व्यवस्थापन या ट्रस्टकडे आहे.
या महाविद्यालयात सध्या १२०० हून अधिक विद्यार्थी कला, विज्ञान आणि वाणिज्य या शाखांमध्ये ज्युनिअर कॉलेजपासून ते पदवी आणि पदव्युत्तर शिक्षण घेत आहेत. गेल्या सात वर्षांपासून विशाल पाडाळे विकास समिती सदस्य म्हणून कार्यरत असून त्यांनी महाविद्यालयाच्या प्रगतीसाठी मोलाचे योगदान दिले आहे.
त्यांच्या योगदानाची दखल घेऊन त्यांची विश्वस्तपदी नियुक्ती करण्यात आली. यानिमित्त आयोजित कार्यक्रमात ट्रस्टचे अध्यक्ष रमेशचंद्र नय्यर यांच्या हस्ते त्यांचा सत्कार करण्यात आला. या वेळी उपाध्यक्ष दत्तात्रय पाळेकर, सचिव ॲड. निलिमा खिरे, खजिनदार दत्तात्रय येवले, सहसचिव ॲड. अजय भोईर, विश्वस्त नंदुभाऊ वाळंज, सुनील ठोंबरे तसेच महाविद्यालयाचे प्राचार्य डॉ. नरेंद्र देशमुख यांच्यासह शिक्षक व कर्मचारी उपस्थित होते.
या प्रसंगी बोलताना विशाल पाडाळे म्हणाले की, “महाविद्यालयाच्या विकासासाठी मी कटिबद्ध आहे. लोणावळा आणि परिसरातील विद्यार्थ्यांना दर्जेदार शिक्षण मिळावे यासाठी नवीन शैक्षणिक कोर्सेस सुरू करण्याचा प्रयत्न केला जाईल.”
