🔥 “लोणावळ्यात अंडी दुकानातून ‘एम.डी.’ विक्रीचा पर्दाफाश!”

लोणावळा : लोणावळ्यात पोलिसांनी केलेल्या धडक कारवाईत अंडी विक्रीच्या दुकानाच्या आडून अंमली पदार्थ विक्रीचा प्रयत्न उधळण्यात आला आहे. या प्रकरणात दोन संशयितांना अटक करण्यात आली असून, पोलिसांनी त्यांच्याकडून मेफेड्रोन (एम.डी.) पावडर असा सुमारे ५ हजार रुपये किमतीचा मुद्देमाल हस्तगत केला आहे.

अंमली पदार्थविरोधी मोहिमेअंतर्गत पुणे ग्रामीणचे पोलीस अधीक्षक संदीपसिंह गिल, अपर पोलीस अधीक्षक रमेश चोपडे व उपविभागीय पोलीस अधिकारी गजानन टोम्पे यांच्या मार्गदर्शनाखाली लोणावळा शहर पोलिसांनी ही कारवाई पार पाडली. ही कारवाई ३१ ऑक्टोबर २०२५ रोजी सायं. ४ वाजता लोणावळ्यातील जी वॉर्ड, इराणी चाळ येथील ‘सितारा एजन्सी’ (अंडी विक्रीचे दुकान) येथे करण्यात आली.

या ठिकाणी ताबान जायर पठाण (वय २९, रा. जी वॉर्ड, इराणी चाळ, लोणावळा) याच्याकडून १ ग्रॅम ३३० मिलीग्रॅम वजनाचा एम.डी. (मेफेड्रोन) अंमली पदार्थ, तर महीपाल साजनराम बिश्नोई (वय ३०, रा. म्हाडा कॉलनी, लोणावळा) याच्याकडून १ ग्रॅम ०३० मिलीग्रॅम वजनाचा एम.डी. पावडर असा मुद्देमाल जप्त करण्यात आला.

दोघांकडून मिळालेला हा अंमली पदार्थ विक्रीसाठी ठेवण्यात आल्याचे पोलिस तपासात समोर आले असून, त्यांच्या विरोधात अंमली पदार्थ नियंत्रण कायदा (NDPS Act, 1985) अंतर्गत गुन्हा नोंदवण्यात आला आहे, अशी माहिती पोलीस निरीक्षक राजेश रामाघरे यांनी दिली.

ही कारवाई लोणावळा शहर पोलिस ठाण्याचे पोलीस निरीक्षक राजेश रामाघरे यांच्या मार्गदर्शनाखाली सपोनि संतोष जाधव, पोहवा संदीप मानकर, राहुल चोरगे, हनुमंत वाळुंज, पोकॉ भूषण कुवर आणि प्रतीक बनसोडे यांच्या पथकाने केली. पुढील तपास सहाय्यक पोलीस निरीक्षक संतोष जाधव करत आहेत.