🌸 इंदुरीत महिलांचा सन्मान सोहळा – विघ्नहर पतसंस्थेकडून पैठणी भेट देत महिलांना दिला सन्मान

इंदुरी (प्रतिनिधी):
श्री विघ्नहर नागरी सहकारी पतसंस्था मर्यादित, इंदुरी यांच्या वतीने दसरा-दिवाळीच्या शुभसंधीवर “महिला सन्मान ठेव योजना २०२५” अंतर्गत भव्य सन्मान सोहळ्याचे आयोजन करण्यात आले. संस्थेच्या कार्यालयात झालेल्या या कार्यक्रमात ठेव योजना अंतर्गत सहभागी झालेल्या महिलांना आकर्षक पैठणी भेट देऊन गौरविण्यात आले.

कार्यक्रमाची सुरुवात मान्यवरांच्या उपस्थितीत झाली. सूत्रसंचालन सौ. सुरेखा ताई शेवकर व सौ. कोमल ताई शिंदे यांनी प्रभावीपणे केले, तर आभार प्रदर्शन सौ. प्रतीक्षा ताई ढोरे व ॲड. नेहा ताई शिंदे यांनी केले. कार्यक्रमानंतर महिलांसाठी विशेष अल्पोपहार व चहापान आयोजित करण्यात आले, ज्यामुळे परिसरात आनंददायी वातावरण निर्माण झाले.

या प्रसंगी संस्थेचे संस्थापक भगवान भाऊ शेवकर, ज्येष्ठ मार्गदर्शक जगन्नाथ शेवकर, साईनाथ भाऊ बाणेकर, चेअरमन स्वप्निल भागवत, उपाध्यक्ष आदित्य शेवकर, सचिव सौ. राधिका शेवकर, कोषाध्यक्ष प्रविण दगडे, तसेच त्यागराज शेवकर, दत्तात्रय शेवकर, निलेश शेवकर, रामदास भांड, किशोर ढोरे, व सोमनाथ पानसरे आदी मान्यवर उपस्थित होते.

मान्यवरांनी महिलांना दिवाळीच्या शुभेच्छा देत या योजनेला मिळालेल्या उत्स्फूर्त प्रतिसादाबद्दल समाधान व्यक्त केले.

विघ्नहर पतसंस्थेचा हा उपक्रम केवळ आर्थिक सेवापुरता मर्यादित न राहता, समाजातील महिलांच्या सन्मान, प्रोत्साहन आणि आर्थिक सबलीकरणाचा एक प्रेरणादायी प्रयत्न ठरला आहे.